sak i di dann zournal
Revue de presse
Sak gramoun té pokor di
Pou fé son rantré litérèr, in gran plézir pou Zédision K’A, prézant azot liv Sully Andoche i vyinn sorti, Sak Gramoun té pokor di, in manir li la trouvé pou amont son réspé èk son rokonésans anvèr Daniel Honoré (1939-2018). Li ékri pou téat, li rakont zistwar li minm la ékri, sa nou koné. Mé ala li anminn anou dékouv in not kalité son gouté, èk in liv 114 provèrb li la invant par li minm, tousala zizité dann 20 sirandane. Anndan-la na la tradision wi, mé na galman in mélanz tout souvnans in manir kozé, in pansé, in lang, in lékritir, i rapèl anou lékritir son dalon Honoré, ké li vé rann omaz inpé konm dann in lésanz kozman.
Sully Andoche lé an plin dan la tradision zistwar èk poèm-zanimo, é la dan sakinn son provèrb, li trouv moyin fé rosort nout manir fèr, mé san obli fé ri la bèk dann in mélanz tandrès èk dirté. Konmsi li di anou tansion panga parapor nout bann défo, nout bann fayté, mé an minm tan li arèt pa mèt anlèr tout kalité valèr i rasanm domoun rant zot. Anparmi bann valèr-la, na inn li mèt an promié : lamour, lamour dann tout son kontour !
Lo tiktak Sak Gramoun té pokor di, sa in lidé son lékrivèr minm, dapré lo trin cafés suspendus : in liv ou asèt = in liv rofèr (é sadla ou rof in not !). Tradision litérèr èk kiltirèl wi, mé la téknolozi koméla i donn pa son par o syin : dan sak liv, ou va trouv in QR Code va anminn si in sit intèrnèt, ousa ou poura akout lo bann provèrb, Sully èk son bann dalon la anrozistré.
Liv pou lir, liv pou akouté, in nafèr lé sir : Sak Gramoun té pokor di i sar ral tout sort kalité domoun, tèlman so ti rougay mazinasion èk moukataz Sully Andoche i flat palé lo kèr sanm léspri.
